Hugh James reappointed to major four-year Welsh Government Legal Services framework

Hugh James wedi’i ailethol i fframwaith Gwasanaethau Cyfreithiol Llywodraeth Cymru am bedair blynedd arall

Yn dilyn proses dendro hynod gystadleuol, rydym wedi llwyddo i gadw ein lle ar Fframwaith Cyflawni Masnachol Llywodraeth Cymru (WGCD), gan atgyfnerthu ein statws fel partner cyfreithiol dibynadwy i’r sector cyhoeddus yng Nghymru.

Mae’r Fframwaith yn cael ei ddefnyddio gan y sector cyhoeddus ehangach yng Nghymru i gael cyngor cyfreithiol mewn amrywiaeth sylweddol o feysydd arbenigol.

Rydym wedi sicrhau penodiadau ar draws 13 o’r 14 lot, gan atgyfnerthu ein harbenigedd mewn meysydd fel gwasanaethau cymdeithasol i oedolion a phlant, ymgyfreitha sifil, llywodraethu corfforaethol, ymgyfreitha troseddol, cyfraith addysg, cyfraith cyflogaeth, contractau masnachol a TG mawr, cyfraith cynllunio ac amgylcheddol, cyfraith eiddo, cyfraith adeiladu a phrosiectau mawr.

Rydym hefyd yn parhau i fod yn un o’r ychydig gwmnïau dethol sy’n cael eu penodi i gynghori Llywodraeth Cymru yn uniongyrchol ar faterion cyfreithiol cymhleth, gan ddangos dyfnder yr arbenigedd sydd gennym a’n hymrwymiad hirsefydlog i gefnogi cyrff sector cyhoeddus ar draws Cymru.

Dyma oedd gan Ioan Prydderch, Pennaeth yr Adran Fusnes i’w ddweud am ein hailbenodiad:

“Rydym yn falch iawn o sicrhau ein lle ar Fframwaith WGCD am bedair blynedd arall. Mae’r llwyddiant hwn yn adlewyrchu arbenigedd ac ymroddiad ein cyfreithwyr a’n timau cymorth, yn ogystal â’n dealltwriaeth o’r heriau sy’n wynebu’r sector cyhoeddus.”

“Rydym yn ymfalchïo mewn darparu gwasanaethau cyfreithiol o’r radd flaenaf sy’n galluogi cyrff cyhoeddus i lywio tirweddau cyfreithiol cymhleth yn effeithiol. Bydd y Fframwaith yn ein galluogi i barhau i gefnogi Llywodraeth Cymru a chyrff cyhoeddus gyda gwasanaethau cyfreithiol o’r safon uchaf. Gyda’n penodiad estynedig, edrychwn ymlaen at gryfhau ein partneriaethau presennol a chefnogi cleientiaid newydd i sicrhau’r canlyniadau gorau i gymunedau ar draws Cymru.”

Mae’r cyhoeddiad hwn yn dilyn penodiadau allweddol diweddar y Partneriaid canlynol: Alex Madden, sy’n arwain y tîm Cynllunio ac Amgylcheddol, a Liz Fletcher, sy’n arwain ar Gaffael Cyhoeddus, penodiadau sydd wedi cryfhau ymhellach ein harferion yn y sector cyhoeddus, sy’n cynghori mwy na 50 o gleientiaid ar draws y DU.